काठमाण्डौं । नेपाल चलचित्र विकास बोर्डको सभाहलमा ओप्सना फिल्मस् प्रालिको आयोजनामा दोस्रो ओप्सना फिल्म एण्ड म्युजिक अवार्ड समारोह भव्यताका साथ सम्पन्न भएको छ । वरिष्ठ चलचित्रकर्मी हरिहर शर्माको प्रमुख आतिथ्यता तथा आयोजक संस्थाका प्रबन्धक निर्देशक ओम प्रकाश राईको सभा अध्यक्षतामा आयोजित उक्त कार्यक्रम कला र संगीत क्षेत्रका विशिष्ट व्यक्तिहरूको उपस्थितिमा सम्पन्न भयो ।
समारोहमा वरिष्ठ गायक शिव परियारलाई राष्ट्रिय सङ्गीत रत्न सम्मानले सम्मानित गरियो ।
यसैगरी, सूर्य बहादुर मगर, भिष्मराज फुलारा, राजेन्द्र बजगाई, शिरोमणि दवाडी, र देवेन्द्र पाण्डे लगायतका व्यक्तित्वहरू पनि विभिन्न राष्ट्रिय सम्मानबाट सम्मानित भए ।
विभिन्न विधामा अवार्ड जित्ने कलाकारहरूमा लोक आधुनिक गीततर्फ अम्बिका गुरुङ र प्रतिमा शिवाकोटी (पब्लिक च्वाइस), लोक आधुनिक गायकमा शम्भु फोम्बो लिम्बु, आधुनिक गायकमा हरि दत्त फुलारा, नीमा शेर्पा (पब्लिक च्वाइस), मोडल पुर्वेली र लोकमा बिजेन्द्र नौबागे, र चलचित्रतर्फ देबेन्द्र बराल लगायतले अवार्ड प्राप्त गरे ।
उत्कृष्ट सम्मान पाउनेहरूमा भुवन के पोखरेल, कुसु गुरुङ, निशा थापा मगर, राजकुमार राई, रिदम कँडेल लगायतका कलाकारहरू रहेका थिए ।
लिम्बू समुदायको कथावस्तुमा आधारित ‘हांङनान्द’को अन्तर्राष्ट्रिय सफलता
दोस्रो ओप्सना फिल्म एण्ड म्युजिक अवार्डमा संस्कृतिका लागि सर्वश्रेष्ठ चलचित्रको अवार्ड जित्न सफल ‘हांङनान्द’ चलचित्रले अन्तर्राष्ट्रिय स्तरमा ठूलो सफलता हासिल गरेको छ ।
लिम्बू समुदायको कथावस्तुमा आधारित यस चलचित्रले नेपालमा प्रतिष्ठित NIFF (Nepal International Film Festival), याक्थुङ आर्टिस चलचित्र एवार्ड, कोशी फिल्म फेस्टिभल, NIFF (Nepal Indigenous Film Festival), र अप्सना फिल्म फेस्टिबलमा नोमिनेशनमा पर्न सफल भएको थियो ।
यति मात्र नभई, यो फिल्मले NIFF (Nepal Indigenous Film Festival) UK मा ‘Best Script Writing’ विधामा Winner Award जित्न सफल भएको छ ।
फिल्मका अभिनेता, निर्माता र प्रस्तोता हेमन्तकृष्ण पाङ्धाक लिम्बूले यो सफलताको श्रेय समस्त दर्शकहरूलाई दिनुभएको छ । उहाँले भोटिङ गर्ने दर्शकहरुलाई समेत धन्यवाद दिनुभएको छ ।
