रमेश थापा हतुवाली, संघर्षबाट सफलताको शिखरमा

धरान — भोजपुरको हतुवागढीमा वि.सं. २०४४ सालमा जन्मिनुभएका रमेश थापा हतुवाली हाल धरानका एक सफल व्यवसायी, सञ्चारकर्मी तथा स्थापित सामाजिक व्यक्तित्वका रूपमा परिचित हुनुहुन्छ। सामान्य परिवेशबाट जीवन यात्रा सुरु गर्नुभएका उहाँले लामो समय वैदेशिक रोजगारीको कठिन दुःख र संघर्ष पार गरेर स्वदेश फर्किनुभएको हो। स्वदेश फर्किएपछि दृढ संकल्पका साथ सानो होटल व्यवसायबाट आफ्नो उद्यमशीलता यात्रा थाल्नुभएका हतुवाली आज धरानमा आफ्नै घर–गाडीसहित स्थापित हुनुका साथै आधा दर्जन नागरिकलाई प्रत्यक्ष रोजगारी समेत प्रदान गर्न सफल हुनुभएको छ।

वर्तमान समयमा प्रिमियम मिट उद्योग, कोशी प्रदेशको बजार प्रतिनिधि तथा बराहक्षेत्र मिडिया प्रा.लि.को सञ्चालक–निर्देशकका रूपमा कार्यरत हतुवाली व्यवसाय र सञ्चार दुवै क्षेत्रमा उत्तिकै सक्रिय हुनुहुन्छ। व्यावसायिक उचाइका साथै सामाजिक उत्तरदायित्वलाई सधैँ प्राथमिकतामा राख्ने हतुवालीले हरेक वर्ष आफ्नो जन्मोत्सवमा असहाय र दुःखीहरूलाई भोजन तथा आर्थिक–भौतिक सहयोग गर्दै आउनुभएको छ। आफ्नो ३५औँ जन्मदिनमा बराहक्षेत्र मिडियाद्वारा स्थापित अक्षयकोषमा आर्थिक सहयोग गर्नुभएका उहाँ हाल “हतुवाली अक्षयकोष” को स्वयं संयोजक रही मानवसेवाको अभियानमा निरन्तर क्रियाशील हुनुहुन्छ।

यसै क्रममा, आज आफ्नो ३९औँ जन्मोत्सवको अवसर पारेर उहाँले आशिष् बचत तथा ऋण सहकारी संस्था लिमिटेडको १६औँ वार्षिकोत्सवमा खुसी आदानप्रदान गर्नुभएको छ। साथै सामाजिक सञ्जालमार्फत सकारात्मक र प्रेरणादायी सन्देश प्रवाह गर्दै समाजमा सहकार्य, सद्भाव र सहयोगको भावना विस्तार गर्न उहाँले आह्वान गर्नुभएको छ। संघर्ष, उद्यमशीलता र परोपकारको अनुपम उदाहरण बन्नुभएका हतुवाली आजको युवा पुस्ताका लागि एक सच्चा प्रेरणाको स्रोत बन्नुभएको छ।