लन्डन, युके – नेपाली लोक रक ब्यान्ड नेपथ्यले लन्डनको प्रसिद्ध ओभल एरिना वेम्बलीमा १२ वर्षपछि आफ्नो ऐतिहासिक सफलतालाई दोहोर्याउँदै एक भव्य कन्सर्ट सम्पन्न गरेको छ। अगस्ट २४, २०८२ (अगस्ट ९, २०२५) शनिबार आयोजित यो कन्सर्टमा १२,००० भन्दा बढी दर्शकहरूको उपस्थिति रहेको थियो, जसले नेपाली संगीतको इतिहासमा नयाँ कीर्तिमान स्थापित गरेको छ।
कन्सर्टको सुरुवात ‘कोशीको पानी’ गीतबाट भएको थियो र त्यसपछि ब्यान्डले आफ्ना लोकप्रिय गीतहरू प्रस्तुत गर्दै दर्शकहरूलाई उत्साहजनक माहोलमा डुबाएको थियो। गायक अमृत गुरुङले आफ्ना कालजयी गीतहरू सुनाउँदै दर्शकहरूसँग संवाद पनि गरेका थिए। उनले नेपाली भाषा र संस्कृतिको संरक्षणका लागि प्रेरणा दिँदै विदेशमा रहेका नेपालीहरूलाई नेपालसँग जोड्ने आह्वान पनि गरे।
गोर्खा खबरसँग कुरा गर्दै आयोजक बीएसके इन्टरटेनमेन्टका निर्देशक सोम चेम्स् (सोम श्रेष्ठ) ले यस कन्सर्टलाई ऐतिहासिक रूपमा विशाल भएको बताए।
‘यो नेपथ्यको मात्र सफलता नभई समग्र नेपाली संगीतको सफलता हो। हामीले १२ वर्षअघि वेम्बलीमा जुन इतिहास रचेका थियौं, आज त्यो इतिहासलाई अझ भव्यताका साथ पुनर्लेखन गरेका छौं,’ उनले भने।
यस कन्सर्टले विदेशमा रहेका नेपालीहरूलाई एकै ठाउँमा ल्याउनुका साथै उनीहरूमाझ राष्ट्रिय गौरवको भावना जगाउन सफल भएको छ। कार्यक्रममा उपस्थित दर्शकहरूले नेपाली झन्डा फहराउँदै र गीतहरूमा सँगै गाउँदै ब्यान्डप्रति आफ्नो माया व्यक्त गरेका थिए। कन्सर्टको अन्त्यमा दर्शकको अत्यधिक मागमा ब्यान्डले ‘रातो र चन्द्रसूर्जे’ पछि ‘हिमाल चुचुरे’ समेत गाएको थियो।
नेपालयका व्यवस्थापक किरणकृष्ण श्रेष्ठले १२ वर्षअघिको कन्सर्टपछि वेम्बलीमा यति ठूलो सफलता पाउनुले ब्यान्डलाई विश्वव्यापी रूपमा अझ प्रतिष्ठित मञ्चहरूमा प्रस्तुत हुन सहज भएको बताए।
वेम्बलीको सफल प्रस्तुतिपछि नेपथ्यको टोली युरोपको भ्रमणमा निस्किनेछ। ब्यान्डले डेनमार्क, माल्टा, पोर्चुगल र बेल्जियममा कन्सर्ट गर्ने तालिका रहेको छ।
फोटोहरु: दिपित राज / नेपालय
